Vestlandsforsking mobiliserer til og utfører forskingsprosjekt, evalueringar og analyserer føresetnader og ringverknader i prosjekt og utviklingsprosessar som omhandlar digitalisering og regional utvikling. Vi deltek regional kompetansedeling og nettverk saman med privat og offentleg sektor og andre FoU-institusjonar. Vi har særleg bidrege med kunnskap knytt til regionale IKT-satsingar, og då ofte utvikla læring basert på regionale, nasjonale og internasjonale samarbeid. 

Vestlandsforsking har sidan 1985 forska på tema, tenester og næringar som er viktige for digitalisering og regional utvikling. Vi har hatt særleg vekt på Vestland, men problemstillingane har og vore relevante for nasjonale og internasjonale prosjektsamarbeid.

Regional utvikling vert til i eit samspel mellom politikk, næringsliv, forsking og utdanning. Omstilling i teneste- og produktutvikling er sentralt og ofte bygd på nytenking knytt til miljø og dei naturressursane fylket er så rikt på. Menneska i regionen er sentrale, med sin kompetanse, si arbeidskraft, sin kultur og identitet. Næringsutvikling, tenesteutvikling, innovasjon, stadutvikling og demografi er ofte tett samanvevde i forskingsprosjekta våre.

Arbeidet vårt innan digitalisering og regional utvikling har vore sentralt for Forskingsrådet sine regionale program. Vi har lang erfaring med mobilisering av næringsliv til innovasjon og omstilling med bruk av forsking, men og forsking i og for næringslivet. Kommunane sine utfordringar og behov har og vore sentrale i, t.d., prosjekt knytt til digitalisering i helsesektoren. I mange av prosjekta er det også naturleg å trekkja inn statleg sektor, sidan ei heilskapleg tilnærming er nødvendig for å få eit godt resultat av digitalisering i offentleg sektor.