Webinarrekke med aktuelle tema for reiselivet
Kunnskapssenter for berekraftig reiseliv inviterer til fem webinar som tek opp problemstillingar som reiselivet i Noreg står overfor, med relevans for reiselivsaktørar, kommunar, lokalbefolkning, forskarar, politikarar og andre. Airbnb, hytter, villrein, slitasje på natur og cruise står på programmet våren 2026.
Plan for webinarrekka:
24. mars kl. 12.15-13.00: Airbnb: Korleis kan reiselivskommunar handtere korttidsutleige og utfordringane det skapar?
Korttidsutleige gjennom plattformar som Airbnb aukar kraftig i Norge, også på Vestlandet. Utviklinga gir nye moglegheiter for verdiskaping, men skapar òg utfordringar for lokalmiljø, bustadmarknad og planlegging. Korleis kan kommunane regulera innanfor dagens regelverk? Alexandra Meyer frå Vestlandsforsking presenterer funn om utfordringar og handlingsrom, og byggjesaksbehandlar Stefan Karlstrøm deler erfaringar frå praktisk reguleringsarbeid i Aurland.
9. april kl. 12.15-13.00: Korleis kan hyttebygging styrkje lokal verdiskaping og gi varige ringverknader?
Det blir bygd stadig fleire og større fritidsbustader i Noreg, ofte samla i tettbygde felt og knytte til etablerte reiselivsdestinasjonar. Slik utvikling kan gi auka aktivitet, arbeidsplassar og forbruk lokalt. Samstundes viser forsking at store delar av verdiskapinga i nybyggfasen går til eksterne aktørar. Korleis kan kommunar og næringsliv leggje til rette for at meir av verdiane blir verande i lokalsamfunnet – også etter at hyttene er bygde? I dette webinaret møter du Idun A. Husabø i samtale med Sverre Landmark, styreleiar i Sogndal Skisenter Eigedom, og Alexandra Meyer frå Vestlandsforsking.
16. april kl.12.15-13.00: Reiseliv i villreinområde
Det naturbaserte reiselivet er i vekst, og friluftslivet opplever auka interesse. Det fører til meir ferdsel i villreinområda, noko som kan føre til meir stress, flukt, redusert beitebruk og fragmenterte leveområde for den allereie sårbare villreinen. Over tid svekker dette både dyra si helse og bestandane si evne til å overleve.
I dette webinaret ser vi på kva tiltak som kan hindre at ferdsel i fjellet forstyrrar villreinen. Samtalen med Haaken Christensen frå Spor AS er leia av Idun A. Husabø.
21. mai kl.12.15-13.00: 21. mai: Stiar og naturattraksjonar under press – er meir tilrettelegging alltid svaret?
Turistar strøymer til Trolltunga, Molden og andre kjende turmål. Når stadig fleire legg ut på slike turar, kva kan vi gjere for å ivareta naturen, lokale turgåarar og opplevingskvaliteten?
I dette webinaret ser vi på funn frå ein fersk analyse av toleevna ved fire populære turmål i Sogn. Eit viktig spørsmål er kva kommunar, destinasjonsselskap, frivilligheit, grunneigarar og forvaltning kan gjere – kvar for seg og saman. Haaken Christensen frå Spor Natur og Reiseliv deltek saman med Anna Kobbeltvedt i Sogn friluftsråd og Marte Meland i Luster kommune. Samtalen er leia av Idun A. Husabø.
23. juni: Cruiseturisme i Sogn: Eksempel på korleis lokalsamfunn kan få til meir verdiskaping
Stadig fleire cruisepassasjerar kjem til bygdene på Vestlandet, og talet på folk som går i land og deltek på aktivitetar, har stige over fleire år. Fordi mange aktørar er involverte frå turisten tingar reisa til utflukta er gjennomført, varierer det kor pengane blir liggande att.
Vestlandsforsking skal undersøke korleis utfluktene blir organiserte i hamner på Vestlandet, og sjå nærare på korleis organiseringa påverkar økonomiske ringverknader for lokalsamfunna. I webinaret møter du Bård Huseby (Vestlandsforsking/Fjærland fjordstove og guide i Skjolden), Ole Øyen (Breheimsenteret), Christian Hellumsand (Skjolden Port) og Eivind Brendehaug (Vestlandsforsking). Samtalen er leia av Idun A. Husabø ved Vestlandsforsking.
Erfaringar frå Sogn
Webinarrekka har komme som eit resultat av arbeidet med Moglegheitsstudie og tolegrenseanalyse for Sognefjorden, finansiert av Sognarådet, med Visit Sognefjord som fagleg rådgjevar i arbeidet.
– Vi har valt ut tema som vi opplever at mange er opptekne av om dagen, og som har høg relevans også utanfor Sogn, fortel Kristin Løseth, leiar for kunnskapssenteret.
